Sabencia ye una organización qu’afala la divulgación n’asturianu de la ciencia col envís de ser una ferramienta que resuelva les duldes tanto cotidianes como profesionales. Pa la consecución d’esti oxetivu, Sabencia desendolca cuatro preseos:
1. Nomenclátor de los seres vivos. Ye una base de datos con más de 10.000 nomes vernáculos n’asturianu d’organismos. El funcionamientu ye cenciellu: a traviés d’una única caxella de gueta, l’usuariu accede a restolar tol nomenclátor pel nome del organismu n’asturianu, castellanu, inglés o binomial científicu. Ye igualmente válido per cualquier parte de la palabra o grafía qu'almita la normativa de l’Academia de la Llingua Asturiana (ḥ, ḷḷ, h., l.l, mayúscules, minúscules, con o ensin tildes, etc). Tamién almite gueta taxonómica (reinu, clas, orde, xéneru y familia). El resultáu obteníu va ser un únicu nome referencial encamentáu por especie. A mou de complementu, úfrense tolos nomes vernáculos equivalentes recoyíos, amás de les formes castellanes, ingleses y semeya identificativa.
2. Recursos léxicos. Son archivos descargables cola información del nomenclátor tresnada en formatu pdf y, por tanto, cola posibilidá de consulta fuera de llínia o afayadiza pa otru tipu de trabayos. A diferencia del nomenclátor, incluyen la taxonomía de cada especie.
3. Comprendoria. Publicación de calter científicu en formatu dixital onde se recueyen diferentes artículos del mundu de la ciencia.
4. Tables d’Equivalencia de Términos. Ye una base de datos cola equivalencia de los términos científicos emplegaos en castellanu en varies disciplines col correspondiente n’asturianu, inequívocu, calteniendo’l matiz y el rigor necesarios pa la lliteratura científica. El funcionamientu recuerda al del nomenclátor: una única caxella de gueta onde l’usuariu accede a restolar peles tables d’equivalencia pel nome asturianu o castellanu. El resultáu va ser una única correspondencia ente los términos equivalentes nos dos idiomes.