Como necesidá de delles persones venceyaes al mundu de la ciencia, surdió’l Nomenclátor de los Seres Vivos en llingua asturiana. Los finxos cimeros d’esti trabayu estableciéronse na recoyida de los nomes asturianos de los seres vivos, nel so estudiu, na so preservación y na so divulgación.
Posteriormente, pensóse que’l Nomenclátor debía tener una ferramienta cola que presentase a la sociedá y contribuyir de manera eficaz a la normativización y normalización de la llingua asturiana. Asina foi como nació la Sociedá Asturiana de les Ciencies SABENCIA, que tien l’envís de desendolcar y esparder la cultura científica n’asturianu.
Escoyóse’l nome de SABENCIA por ser la pallabra asturiana que meyor describe lo que pretende ser: un llugar atecláu pol rigor científicu au axuntar saberes y asoleyar toles estayes del saber. Nesti sen va’l segundu significáu del nuesu nome que queremos ver nel acrónimu del “SABEr de la cieNCIA”.
Escoyimos como logotipu l’elefante prehistóricu de la Cueva’l Pindal, por ser símbolu de lo que cuidamos foi l’aniciu de la ciencia. Nunos tiempos nos que la maxa ya’l conocimientu empíricu taben mecíos, esti fechu revela una evolución cognitiva complexa y consciente que, col pasar de los sieglos, acabó por xebrase de lo sobrenatural y convertise en ciencia.