NOMENCLÁTOR DE LOS SERES VIVOS

Dir al Nomenclátor –> sabencia.net/nomenclator.php

El Nomenclátor de los Seres Vivos ye’l proyeutu xerme de SABENCIA, que naz col envís de normalizar l’usu de los nomes asturianos de tolos grupos de fungos, plantes y animales.
El so accesu ye al traviés de la caxella de gueta, ufriéndose varies opciones p’algamar con éxitu la mesma. Esta caxella permite restolar tola base de datos del nomenclátor pel nome del organismu n’asturianu, castellanu o inglés, siendo igualmente válido per cualquier parte de la pallabra o grafía qu’almita la normativa de l’Academia de la Llingua Asturiana (ḥ, ḷḷ, h., l.l, mayúscules, minúscules, con o ensin tildes, etc.). Tamién almite gueta taxonómica (reinu, clas, orde, xéneru y familia).
Los resultaos namái ufren un únicu términu referencial pa cada especie biolóxica.

Darréu, exemplificamos cola busca d’algaraván los resultaos qu’ufre’l nomenclátor:

 

exemplu web

La web va amosar toles especies que tengan esi nome, tanto les que proponemos como nome referencial, como les que tamién pueden nomase asina. Nel exemplu vemos tres especies, les dos que lleven el nome algaraván como nome normalizáu, y otra que, anque’l so nome patrón nun ye esi, sí apaez como nome pa esta especie na sinonimia asturiana.
Esa sinonimia podemos vela pa toles especies al poner el punteru enriba’l nome asturianu que damos; amás danse los nomes n’inglés, castellanu, la so taxonomía y una semeya del organismu respeutivu.
Como ampliación a cada especie, amiéstase una ficha de la mesma au s’esplica’l porqué del nome referencial propuestu, les variantes dialeutales recoyíes hasta la fecha, la so etimoloxía, distribución xeográfica, toponimia venceyada y otru tipu d’información que s’estima oportuna.